ཆུ་རགས་ལས་གཞི་བརྒྱུད་དེ་དཔལ་འབྱོར་ཡར་རྒྱས་གཏོང་རྒྱུ་ཡིན།

རྒྱ་ནག་གཞུང་གིས་འབྲི་ཆུ་གཙང་པོའི་སྟོད་ཕྱོགས་སུ་འཁེལ་བའི་ཅིན་ཤ་གཙང་པོའི་སྟེང་གཞི་རྒྱ་ཆེ་བའི་ཆུ་རགས་ལས་གཞི་ཐོག་མ་དེ་མགོ་འཛུགས་བྱས་ཡོད་འདུག

བརྒྱུད་ལམ་ཐོག་གནས་ཚུལ་འཐོན་པ་ལྟར་ན། རྒྱ་ནག་གཞུང་གིས་འབྲི་ཆུ་གཙང་པོའི་སྟོད་ཕྱོགས་སུ་འཁེལ་བའི་ཅིན་ཤཱ་(Jinsha River)གཙང་པོའི་སྟེང་ཆུ་རགས་ལས་གཞི་མགོ་འཛུགས་བྱས་ཡོད་པ་དང་། ལས་གཞི་དེའི་མིང་ལ་སུ་ཝ་ལོན་ Suwalong hydro power project ཟེར་ཞིང་། དེ་ནི་སི་ཁྲིན་ཞིང་ཆེན་གྱི་འབའ་ཐང་རྫོང་དང་མར་ཁམས་རྫོང་གཉིས་ཀྱི་ས་ཁུལ་དུ་འཁེལ་ཡོད་འདུག

ལས་གཞི་དེ་ཉིད་སྤེལ་རྗེས་ཆུ་ཤུགས་གློག་ཚད་ནུས་པ་ ༡།༢ gigawatts དང་། ༢༠༢༡ ལོར་ལས་གཞི་དེ་ཉིད་ལེགས་གྲུབ་བྱུང་མཚམས་ཆུ་ཤུགས་གློག་ཚད་ནུས་པ་ ༥༤༠༠ gigawatt ཙམ་རྒྱུན་གནས་ཐུབ་ཀྱི་ཡོད་སྐོར་བརྗོད་འདུག

ཅིན་ཤ་ཆུ་རགས་ལས་གཞི་དེའི་བཟོ་དབྱིབས་དང་རྒྱ་ཁྱོན་ནི་དེ་སྔོན་ཟླ་བ་བཅུ་པའི་ནང་ལེགས་གྲུབ་ཟིན་པའི་ཡར་ཀླུང་གཙང་པོའི་སྟེང་བརྒྱབ་པའི་ཛང་མུ་ Zangmu ཆུ་རགས་ལས་ཀྱང་ལྡབ་གཉིས་ཀྱིས་ཆེ་བ་ཡོད་འདུག

ཆུ་རགས་དེར་རྒྱ་སྒོར་དུང་ཕྱུར་ ༡༨ བཏང་ཡོད་པ་དང་། ཆུ་རགས་དེ་བརྒྱུད་ནས་རྒྱ་ནག་ཤར་ཕྱོགས་ཀྱི་ས་ཁུལ་ཙམ་དུ་མ་ཟད། བོད་ཤར་ཕྱོགས་ཀྱི་ས་ཁུལ་ཁག་ལའང་དཔལ་འབྱོར་མཐུན་རྐྱེན་བསྐྲུན་ཐུབ་ཀྱི་ཡོད་སྐོར་བརྗོད་འདུག །

བོད་ཀྱི་དུས་བབ་ལས་དྲངས།

ཐེངས་ 42177 བཀླགས་འདུག