རྒྱ་ནག་གིས་གཏེར་ཁ་སྲུང་སྐྱོབ་བྱེད་མཁན་བོད་མི་བཞི་འཇུ་བཟུང་།
སྤྱི་ལོ་ ༢༠༡༤ ལོའི་སྤྱི་ ༤ ཚེས་ ༢༡ ཉིན་གྱི་ཕྱི་དྲོ་དཀར་མཛེས་བོད་རིགས་རང་སྐྱོང་ཁུལ་དཔལ་ཡུལ་རྫོང་ཁྲོཾ་ཐར་ཆུས་འབར་ཆུང་ཡུལ་ཚོའི་བོད་མི་ཐུབ་དགའ་དང་། དགའ་བདེ། སྐྱ་མོ། འཇམ་དབྱངས་བཅས་བོད་མི་བཞི་གློ་བུར་ས་གནས་རྒྱ་ནག་གི་ཉེན་རྟོག་པས་འཇུ་བཟུང་བྱས་འདུག
མ་ཚད་ས་གནས་སུ་ཉེན་རྟོག་པས་ཡུལ་མི་ཕར་ཚུར་འགྲོ་བསྐྱོད་ལ་བཀག་སྡོམ་དང་དམ་དྲག་བྱེད་བཞིན་པ་རེད་འདུག དེ་ནི་ལོ་མང་རིང་ཁྲོམ་ཐར་ས་གནས་སུ་རྒྱ་ནག་གི་འབྲེལ་ཡོད་གཏེར་འདོན་ཚན་པ་ཞིག་གིས་གསེར་གྱི་གཏེར་ཁ་སྔོག་འདོན་བྱས་དང་བྱེད་བཞིན་པའི་གནས་སྟངས་འོག ས་གནས་ཀྱི་ཁོར་ཡུག་ལ་གནོད་སྐྱོན་ཐེབས་པ་དང་ས་གནས་མི་དམངས་ལ་དཀའ་ངལ་འཕྲད་བཞིན་པར་བརྟེན་གོང་བརྗོད་བོད་མི་ཁོང་ཚོས་ཉེ་བའི་སྤྱི་ཟླ་ ༢ བའི་ཟླ་མཇུག་ལ་གཏེར་ཁ་སྔོག་འདོན་བྱེད་བཞིན་པར་མི་འདོད་ངོ་རྒོལ་བྱས་པ་ཞིག་རེད་འདུག
ས་གནས་བོད་མི་ཞིག་གིས་བརྗོད་དོན། སྤྱི་ཟླ་ ༤ ཚེས་ ༢༡ ཉིན་བོད་མི་ཁོང་བཞི་བོ་འཛིན་བཟུང་བྱས་རྗེས་དེ་སྔོན་གཏེར་ཁ་སྔོག་པར་ངོ་རྒོལ་གྱི་འབྲེལ་ཡོད་མཁན་བོད་མི་ཁག་གཅིག་ཉེན་ཡོལ་ཆེད་རི་ལ་བྲོས་ཟིན་པ་བརྗོད་ཡོད།
དེ་བཞིན་ས་གནས་སུ་དམ་དྲག་གི་གནས་སྟངས་ཁྲོད་སྤྱི་ཟླ་ ༤ ཚེས་ ༢༣ ཉིན་གྱི་དགོང་མོར་བུད་མེད་རྒོད་ལོ་ཟེར་བ་ཞིག་ལ་ཡང་ཉེན་རྟོག་པས་རྒྱུ་རྐྱེན་གསལ་བོ་མེད་པར་གཅར་རྡུང་བྱས་ཡོད་པ་དང་། ད་དུང་གང་བྱུང་གིས་བོད་མི་འཛིན་བཟུང་བྱེད་ཐབས་བྱེད་པ་སོགས་ཀྱི་གནས་ཚུལ་ཐོན་བཞིན་ཡོད་འདུག
ཡོང་ཁུངས་ཨེ་ཤ་ཡའི་རང་དབང་རླུང་འཕྲིན་ཁང་།
ཐེངས་ 42191 བཀླགས་འདུག