རྡོ་སོལ་སྔོག་པ་དང་ཨ་དགེ་སྐྱིད་ལུང་གི་རྩྭ་ཐང་ལ་ཉམས་རྒུད།
ནང་ཆེན་ཕྱོགས་སུ་རྡོ་སོལ་སྔོག་འདོན་བྱས་བར་ས་གནས་བོད་མིར་དཀའ་ངལ་འདྲ་མིན་འཕྲད་བཞིན་པ་རེད་འདུག དེ་ཡང་བོད་ནས་འདི་གར་གནས་ཚུལ་འབྱོར་དོན།
རྒྱ་ནག་གི་ཁེ་ལས་ཚན་པ་ཞིག་གིས་ཡུལ་ཤུལ་ཁུལ་ནང་ཆེན་རྫོང་སྡོམ་པ་ཡུལ་ཤོག་གོ་གཞུང་རུ་ཆེན་ས་གནས་སུ་ཉེ་བའི་ལོ་ངོ་ཁ་ཤས་ནང་རྡོ་སོལ་གྱི་གཏེར་ཁ་ཤུགས་ཆེན་སྔོག་འདོན་བྱས་བར་བརྟེན་ས་གནས་ཀྱི་ཁོར་ཡུག་ལ་གཏོར་སྐྱོན་ཚབ་ཆེན་ཐེབས་པ་དང་། མི་དང་སྒོ་ཕྱུགས་སེམས་ཅན་ལ་གནོན་འཚེ་ཐེབས་པ་སོགས་ཀྱི་དཀའ་ངལ་འདྲ་མིན་འཕྲད་བཞིན་པ་རེད་འདུག 
ས་གནས་བོད་མི་ཞིག་གིས་བརྗོད་དོན།
འདས་བའི་ལོ་ངོ་༨ཙམ་རིང་རྡོ་སོལ་སྔོག་འདོན་གྱི་ལས་གཞིའི་འོག་སྙིགས་རོ་རྣམས་གང་ཡིན་སར་སྤུང་བ་སོགས་བྱས་པས་ཨ་དགེ་སྐྱིད་ལུང་གི་རྩྭ་ཐང་ལ་ཉམས་རྒུད་ཧ་ཅང་ཆེན་པོ་བྱུང་བ་མ་ཟད། གཏེར་ཁ་སྔོག་འདོན་བྱས་པའི་ལོ་དེ་དག་ལྷག་པར་༢༠༠༩ལོ་ནས་མི་དང་སེམས་ཅན་ལ་ན་ཚ་འདྲ་མིན་ཕོག་པ་དང་། དུས་མིན་འཆི་བ་སོགས་རྒྱུན་ལྡན་མ་ཡིན་པའི་གནས་ཚུལ་བྱུང་།
དར་མ་ལོ་ཆུང་རྣམས་ཀྱི་ཁྲག་ཤེད་མཐོ་པོར་གྱུར་ནས་ལོ་གཅིག་གི་ནང་ལ་ཆ་སྙོམས་མི་གྲངས་༥ནས་༡༠བར་འཆི་བ་མ་ཚད་བྱིས་བ་རྣམས་སྐྱེས་དུས་མ་ཡིན་པར་སྐྱེ་བ་དང་འཆི་བ་སོགས་མདོར་ན་ཕྱིའི་ཁོར་ཡུག་དང་ནང་སེམས་ཅན་ལ་ནག་ཉེས་ཆེན་པོ་བཟོས་པའི་གནས་སྟངས་མ་བཟོད་པར་ས་གནས་བོད་མི་དང་།
དགོན་སྡེ་ཁག་བཅས་ནས་རབ་དང་རིམ་པར་མི་འདོད་ངོ་རྒོལ་བྱས་པར་བརྟེན་གནས་སྐབས་མཚམས་འཇོག་ཐུབ་པ་བྱུང་ཡོད་མོད། 
ད་སྐབས་བསྐྱར་དུ་རྫོང་རིམ་པའི་ས་གནས་རྒྱ་ནག་གི་འབྲེལ་ཡོད་ཚན་པ་ཁག་གི་མི་སྣ་ཚོ་ཡང་ཡང་སྡོམ་པ་ཡུལ་ཤོག་གོ་གཞུང་རུ་ཆེན་ལ་ཡོང་ནས་བོད་མི་ཚོར་ས་གནས་སུ་རྡོ་སོལ་གཏེར་ཁ་ཕུན་སུམ་ཚོགས་པ་ཡོད་པ་དང་། རྡོ་སོལ་གཏེར་ཁ་མུ་མཐུད་སྔོག་འདོན་ཡོང་ཐབས་ལ་དངོས་ཤུགས་བརྒྱུད་གསུམ་ནས་ཐབས་ཤེས་བྱེད་བཞིན་པར་ས་གནས་བོད་མིའི་ཁྲོད་གླེང་སློང་དང་སེམས་འཚབ་ཆེན་པོ་བྱེད་བཞིན་པས་རྩོད་རྙོག་འབྱུང་ཉེན་འདུག་ཅེས་དང་།
ས་གནས་བོད་མི་རྒན་རབས་པ་ཚོས་ཁོང་ལ་བརྗོད་པ་ལྟར་ན། ཁོང་ཚོའི་ས་གནས་སུ་མི་དང་སྒོ་ཕྱུགས་སེམས་ཅན་ལ་ན་ཚ་འདྲ་མིན་ཕོག་ནས་
ཤི་བ་སོགས་སྔར་བྱུང་མ་མྱོང་བའི་གོད་ཆགས་འདྲ་མིན་ཡོང་བཞིན་པ་ནི་ས་གནས་ནས་རྡོ་སོལ་དང་གཏེར་ཁ་སྔོག་འདོན་བྱས་བ་ནས་བྱུང་བ་ཡིན་པ་བཤད་ཡོད་འདུག
ཡུལ་ཤུལ་སྐྱེ་རྒུ་མདོ་ཁུལ་ནང་ཆེན་རྫོང་སྡོམ་པ་ཡུལ་ཤོག་གོ་གཞུང་རུ་ཆེན་ཕྱོགས་ཀྱི་བོད་མི་རྣམས་འབྲོག་ལས་ལ་བརྟེན་ནས་འཚོ་བ་སྐྱོང་ཐབས་བྱེད་བཞིན་པ་དང་། སྤྱི་ལོ༢༠༠༠་ལོ་ཙམ་ནས་ཁེ་ལས་ཚན་པ་འདྲ་མིན་བརྗེ་སྤོར་བྱས་ནས་ས་གནས་དེའི་རྡོ་སོལ་གཏེར་ཁ་སྔོག་འདོན་བྱས་ཡོད།
ཡོངས་ཁུངས་ཨེ་ཤེ་ཡ་རང་དབང་རླུང་འཕྲིན་ཁང་།
ཐེངས་ 42338 བཀླགས་འདུག