རྩྭ་སའི་དོན་དུ་སྡེ་བ་གཉིས་དབར་དམར་འཛིང་བྱས་པ།
རྒྱུད་ལམ་ཁག་ཏུ་གནས་ཚུལ་ཐོན་གསལ་ལྟར་ན། ཕྱི་ལོ། ༢༠༡༤ ཟླ། ༨ ཚེས། ༡༢ བོད་མདོ་སྨད་རྨ་ལྷོ་ཁུལ་རེབ་གོང་རྫོང་གི་ཀོའུ་སྡེ་བ་དང་ཉ་ལུང་སྡེ་བ་གཉིས་དབར་རྩྭ་ས་རྩོད་གླེང་བྱུང་སྟེ། ཉ་ལུང་སྡེ་བའི་ལོ་ན་ ༢༠ ཡས་མས་ཀྱི་ན་གཞོན་ཞིག་བསད་པ་དང་། མི་ཁག་གཅིག་ལ་རྨས་སྐྱོན་ཚབས་ཐེབས་ཏེ་སྨན་ཁང་དུ་བསྐྱལ་དགོས་བྱུང་ཡོད་འདུག
ཐེངས་འདིའི་འཁྲུག་རྐྱེན་གཙོ་བོ་ནི། ཀོའུ་སྡེ་བའི་མི་ཁག་ཅིག་གིས་སེམས་ཅན་འཚོ་བཞིན་པའི་སྐབས་ཉ་ལུང་སྡེ་བའི་མི་ཡོང་སྟེ། ས་ཆ་དེ་ནི་ཉ་ལུང་སྡེ་པར་བདག་པ་ལས་ཀོའུ་སྡེ་པས་ས་ཆ་དེའི་ཐོག་སེམས་ཅན་འཚོ་མི་ཆོག་པ་བཤད་པ་མ་ཟད། ཀོའུ་སྡེ་བའི་ཕྱུག་རྫི་གཉིས་ལ་ཉེས་རྡུང་བཏང་བའི་དོན་རྐྱེན་ནས་སྡེ་བ་གཉིས་ཕན་ཚུན་རྩྭ་སའི་དོན་དུ་འཁྲུག་རྩོད་འགོ་ཚུགས་པ་ཞིག་ཡིན་འདུག
འཁྲུག་རྩོད་དེ་གོང་ཚེས་ཉིན་གྱི་སྔ་དྲོའི་ཆུ་ཚོད་ ༡༢ ཙམ་ལ་ཤོར་བ་ཞིག་ཡིན་ཞིང་། ཆུ་ཚོད་ ༨ ལྷག་རིང་དམག་མི་དང་ཉེན་རྟོག་པ། སྡེ་བ་གཞན་གྱི་མི་སོགས་བར་འདུམ་དང་བཀག་འགོག་བྱེད་མཁན་གཅིག་ཀྱང་མ་བྱུང་བས། ཕྱོགས་གཉིས་ཀས་རྡོ་དང་གྲི་བཟུང་ནས་དམར་འཛིང་ཚབ་ཆེན་བྱས་ཡོད་པ་རེད་འདུག ཕྱི་ཚེས་ ༡༣ ཉིན་རྒྱ་ནག་གཞུང་གི་དམག་མི་ཀོའུ་སྡེ་བར་ཡོང་སྟེ་སྡེ་བའི་མི་མང་འཛིན་བཟུང་བྱ་རྒྱུའི་འཇིགས་སྐུལ་བྱེད་བཞིན་ཡོད་འདུག་སྟབས། ཀོའུ་སྡེ་བའི་མི་ཚོ་རི་བརྒྱུད་དུ་བྲོས་བྱོལ་དུ་འགྲོ་བཞིན་ཡོད་འདུག
བོད་ནང་གི་དྲ་ཚིགས་ཤིག་ཏུ་ཐེངས་འདིའི་གནས་ཚུལ་དང་འབྲེལ་བའི་རྩོམ་ཡིག་ཅིག་སྤེལ་ཡོད་པའི་ནང་།
<<བོད་ལ་ཁྲིམས་མེད་ལུགས་མེད་ཀྱི་གཤིས་ཀ་ཞིག་ཏན་ཏན་འདུག>>
<<རེབ་གོང་གི་རྩྭ་ས་རྩོད་གླེང་གི་གནད་དོན་ནས་འབྲེལ་ཡོད་ལས་བྱེད་པར་སྡིགས་དམོད་གཏོང་བ།>>སྡེ་བ་འདི་གཉིས་ཀྱི་ནང་དུ་རྒྱལ་ཁབ་ཀྱི་ས་གནས་རིམ་པའི་འབྲེལ་ཡོད་ལས་ཁུངས་ཀྱིས་རྩ་ཁྲིམས་དང་བཅའ་ཁྲིམས་ཀྱི་ཤེས་བྱ་རྒྱུད་སྒྲོག་བྱས་པ་འདང་མེད་པ་མ་ཟད། གཞན་དག་ལའང་སྡེ་འདི་གཉིས་ནང་བཞིན་སྤྱི་དམངས་ཁྲིམས་སྲོལ་གྱི་ཤེས་བྱ་ཧ་ཅང་དམའ་མོ་ཡིན། ལོ་ངོ་འདི་དག་གི་རིང་ལ་རྒྱལ་ཁབ་ཀྱི་འབྲེལ་ཡོད་མགོ་ཁྲིད་དག་གིས་ཁུལ་དང་རྫོང་། གྲོང་རྡལ་དང་ཤང་། སྡེ་བ་སོ་སོ་བཅས་སུ་ཁ་ཕྲལ་ལ་ངོ་རྒོལ་དང་། མི་རིགས་མཐུན་སྒྲིལ་གཏོར་བརླག་ལ་ངོ་རྒོལ། གཏོར་བཅོམ་འཕྲོག་གསུམ་ལ་ངོ་རྒོལ་སོགས་ཞེད་སྣང་ཚ་བོ་ཡིན་པའི་མིང་བརྡ་འདི་དག་གི་སྟེང་ལ་ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་མི་རིགས་ས་གནས་རང་སྐྱོང་གི་ཁྲིམས་ལུགས་དང་། སྲིད་ཇུས་རྒྱུད་སྒྲོག་བྱས་པ་ལས། སྤྱི་དམངས་ནང་ཁུལ་གྱི་བདེ་འཇགས་དང་ཁྲིམས་མཐུན་གྱི་ཁེ་དབང་ལ་ཇི་ལྟར་སྲུང་སྐྱོབ་བྱེད་དགོས་མིན་དང་། སྡེ་བ་སོ་སོའི་རྩྭ་སའི་ས་མཚམས་ཀྱི་ཐད་ལ་ཐག་གཅོད་གསལ་བོ་ཅི་ཡང་བྱས་མེད་པ་རེད། རྩྭ་སའི་མཚོན་པའི་གྱོད་སྣ་ཁ་མཆུ་ཡོང་བཞིན་པ་འདི་དག་གི་སྐབས་སུ་མི་དམངས་ཀྱིས་རང་གི་ཁེ་དབང་སྲུང་སྐྱོབ་ཀྱི་ཚད་མཐོ་བའི་ཐབས་ཤེས་ནི་གྲི་དང་མེ་མདའ་ལས་གཞན་ཅི་ཡང་དྲན་གྱི་མེད་པ་སུས་གནད་དོན་རེད་དམ། ངས་བསམ་ན་མི་དམངས་མང་ཚོགས་ལ་ཁག་མེད་པའི་གནས་སྟངས་གཅིག་ཡོད་པ་ནི། ཁོ་ཚོར་མཚོན་ན་ཁྲིམས་ལུགས་ནི་དགེ་སྡུག་གི་བླང་དོར་ལྟ་བུ་མ་ཡིན་པར་ཧ་ཅང་ལྐོག་གྱུར་དང་ཁག་པོ་ཡོད། དགེ་སྡུག་གི་བླང་དོར་ཕ་མ་ནས་རིམ་པར་བུ་ཕྲུག་ལ་བག་ཆགས་འཇོག་གི་ཡོད་པ་བཞིན་ཁྲིམས་ལུགས་ལ་དེ་བཞིན་བག་ཆགས་འཇོག་ཐུབ་མེད་ལ། ཕ་མ་དག་ལའང་ཁྲིམས་ལུགས་ཀྱིས་རང་ཉིད་སྲུང་སྐྱོབ་བྱེད་སྲོལ་རྫོང་དང་ཤང་རིམ་པས་གོ་བསྐོན་བྱས་མྱོང་མེད། འདི་ནི་དངོས་གནས་འགན་མ་འཁུར་བའི་བྱ་སྤྱོད་ཚབས་ཆེན་རེད། རྫོང་རིམ་པའི་ལས་བྱེད་པ་དེ་དག་གྲོང་སྡེ་སོ་སོར་འགྲོ་དུས་ཁོ་ཚོས་ཆེས་ཐོག་མར་རང་གི་འདུག་གནས་གཏན་འཁེལ་དང་། དེ་ནས་ལུག་བཤའ་བ། ཆང་འཐུང་བ། རྒྱན་འཇོག་པ་སོགས་འགྲོ་སོང་ཅི་ཡང་མེད་པའི་སྤྲོ་སྐྱིད་ལ་ཅི་དགར་རོལ་རྗེས་ཕྱིར་ལོག་ཆོག་གི་རེད། སྤྲོ་སྐྱིད་འདིའི་རྗེས་ནས་ཡག་པོ་བྱུང་ན་སྡེ་བ་དེར་མུག་སྐྱོབ་དང་། བུན་གཡར་གྱི་ཁེ་ཕན་ཕྲན་བུ་རག་གི་ཡོད།
འདས་པའི་ལོ་ཤས་རིང་བོད་ཁུལ་གྱི་ཁུལ་དང་རྫོང་། ཐ་ན་ཤང་དང་སྡེ་བ་ཁ་ཤས་བཅས་སུ་མི་དམངས་ཀྱིས་སྐད་འབོད་ངོ་རྒོལ་དང་། སློབ་ཕྲུག་གིས་ངོ་རྒོལ། དགེ་རྒན་གྱིས་ངོ་རྒོལ་སོགས་བྱུང་དུས་དམག་དཔུང་རླངས་འཁོར་ཁ་ཤས་སྐད་ཅིག་དེ་ཉིད་དུ་ཐོན་ཐུབ་ཀྱི་ཡོད་ཀྱང་། ཁ་སང་གི་ཆུ་ཚོད་བརྒྱད་རིང་གི་བདེ་གཟར་དེ་ལ་མྱུར་མགྱོགས་ཀྱི་དམག་དཔུང་སླེབས་ཐུབ་མེད་ལ་མི་མང་དག་ཅིག་སྨན་ཁང་དུ་བསྐྱལ་བ་དང་། མི་གཅིག་གི་གཅེས་སུ་འོས་པའི་ཚེ་སྲོག་ཤོར་ཡང་། མང་ཚོགས་ཀྱིས་ད་དུང་རང་ཉིད་ལ་ཁྲིམས་ལུགས་ཀྱིས་ཇི་ལྟར་སྲུང་སྐྱོབ་དང་། ཉེས་ཆད་གཅོད་རྒྱུ་ཡིན་པ་ཤེས་མེད་ལ། མུ་མཐུད་དུ་ལག་འཛིང་དང་རྡོ་འཛིང་། གྲི་འཛིང་གིས་ལ་རྒྱ་རྩོད་དགོས་པའི་སེམས་ཁམས་ཤིག་འཁྱེར་ཡོད། ངས་བསམ་ན་མཚོ་སྔོན་ཞིང་ཆེན་གྱི་ཁོངས་ནས་མཚོ་ལྷོ་བོད་རིགས་རང་སྐྱོང་ཁུལ་གྱིས་མི་དམངས་མང་ཚོགས་ལ་ཁྲིམས་ལུགས་ཤེས་བྱ་རྒྱུད་སྒྲོག་བྱས་པ་ནི་སྔོན་ཐོན་རེད། དེ་ནི་མིག་དཔེར་འོས་པ་ཞིག་རེད་ཀྱང་། རྨ་ལྷོ་ཁུལ་ལྟ་བུའི་སྲིད་གཞུང་གི་ལས་འགན་གཡོ་ཟོལ་གྱིས་སྒྲུབ་པར་མཁས་པའི་དཔོན་ངན་དག་གིས་སྣང་མེད་གཏོང་བཞིན་པའི་གནད་དོན་འདི་ཤེས་ཡོན་པ་རྣམས་སྡེ་བ་སོ་སོར་སོང་ནས་མཚན་མོའི་སློབ་གྲྭའི་ཚུལ་དུ་གསབ་སྦྱོང་སྤྲོད་རྒྱུ་ནི་ཧ་ཅང་ལེགས་པོ་ཡིན་མོད། དཔོན་ངན་དག་གིས་རང་གི་ཁ་ཕོར་འཕྲོག་གི་ཡོད་པ་བཞིན་དེ་ཡང་ལམ་ལྷོང་ཡོང་དཀའ་རྒྱུ་རེད་ཨང་། དེ་ནི་དུས་རབས་འདི་འདྲ་ཞིག་དང་། སྤྱི་ཚོགས་འདི་འདྲ་ཞིག་གི་སྐབས་སུ་མི་རིགས་གཞན་དང་རྒྱལ་ཁབ་གཞན་གྱི་སྣང་ངོར་བོད་སྔར་བཞིན་ཁྲིམས་མེད་ལུགས་མེད་ཀྱིས་བསྡད་ཚེ་རྒྱུ་མཚན་མེད་པར་རེབ་གོང་ཚར་རྒྱུ་རེད་ལ། བོད་ཀྱང་ཚར་རྒྱུ་རེད་ཅེས་བྲིས་འདུག
ཐེངས་ 42225 བཀླགས་འདུག